ஹே....ராம் தேவ்...உனது கோபத்தின் விலை என்ன?

மத்யமரின் கைப்புள்ள அன்னா அசாரே ஊழலுக்கு எதிராகப் போராடியதை அடுத்து பாபா ராம்தேவ் கருப்புப்பணத்தை மீட்க சத்தியாகிரகப் போராட்டம் என்று சொல்லப்படுகிற உண்ணாவிரத்தை டில்லி ராமலீலா மைதானத்தில் துவங்கினார். கருப்புப் பணத்தை மீட்க வழக்கம் போல வல்லுநர் குழு அமைக்கப்படும் என்ற உத்திரவாதத்தை எழுத்து மூலமாக பெற்றுக் கொண்டால் உண்ணாவிரத்தை கைவிடுவேன் என்ற ராம்தேவின் கோரிக்கையை ஏற்று அப்படியான ஒரு கடித்தத்தை மத்திய அரசு கொடுத்த பின்னரும் உண்ணாவிரதத்தை கைவிட மறுத்த ராம்தாவ் கூட்டத்தை அதிகாலை ஒரு மணிக்கு கலைத்து விரட்டியிருக்கிறது. டில்லி போலீஸ் இப்போது டில்லியில் கலவர அபாயம் காரணமாக 144 தடை உத்தரவு. ராம்தேவ் 15 நாட்களுக்கு டில்லிக்குள் நுழையத் தடை. அவரைக் கொண்டு போய் ஹரித்துவாரில் உள்ள அவரது ஆஸ்ரமத்தில் விட அங்கேயே தனது இந்துப் பரிவாரங்களோடு உண்ணாவிரதம் இருக்கிறார் ராம்தேவ். பாபர் மசூதி இடிப்புக்கு முன்னர் நாடு முழுக்க பிரச்சாரங்களை கட்டவிழ்த்து விட்டது போன்று இப்போது இந்து பரிவாரங்கள் டில்லிச் சம்பவங்களை இந்திய வரலாற்றில் கருப்பு நாள் என்றும், அந்நிய பெண்ணான சோனியாவுக்கு இந்தியாவின் மீது அன்பு இல்லை என்றும் அறைகூவல் விடுகிறார்கள்.

ஒரு சாராசரியான யோகா ஆசாமியால் கூட சுமார் பதினைந்து நாட்கள் வரை உண்ணாவிரதம் இருக்க முடியும். ராம் தேவால் ஒரு மாதம் கூட இருக்க முடியும் என்னும் நிலையில் அன்னா அசாரே போன்ற காங்கிரசின் கைப்புள்ளைகளை சமாளிக்க பிஜேபி கண்டு பிடித்த யோகா குருதான் இந்த ராம்தேவ். ஐந்து ஆண்டுகளுக்கு முன்னர் வரை இந்த ராம்தேவ் என்பவரை இந்தியச் சமூகங்கள் அறிந்திருக்க வில்லை. இந்த திடீர் சாமியாரை சீனுக்கு கொண்டு வந்து பாப்புலராக்கியது அன்புமணி ராம்தாஸ்தான். அவர் சுகாதாரத்துறை அமைச்சராக இருந்த போதுதான் ராம்தேவை ஒரு இந்திய சமூகங்களில் ரோல் மாடலாகவும், தனது உடல் தூய்மை குடும்ப பாரம்பரீய கோட்பாட்டு அறிப்புகளுக்கான வடிகாலாகவும் வரித்துக் கொண்டார். அதிலிருந்தே ராம்தேவ் இந்தியா முழுக்க பிரபலமானார். ராம்தேவின் உண்ணாவிரத்தை ஆர்.எஸ்.எஸ், வி.எச்.பி. பஜ்ரங்தள், பிஜேபி போன்ற இந்துத்துவக் குழுக்களும் தூய்மைவாத பார்ப்பன அமைப்பான பிரம்மகுமாரிகள்,இராமகிருஷ்ணா மடம் போன்ற பார்ப்பன இந்துமத அமைப்புகளும் ஆதரிக்கின்றன, இது போக கரசேவை என்னும் பெயரில் காவி ரௌடிப் படையை அயோத்தி நோக்கித் திரட்டி பாபர் மசூதியை இடிக்க கூட்டம் சேர்த்த சாத்வி ரிதம்பரா என்னும் கிரிமினல் குற்றவாளியான பெண் சாமியார் உள்ளிட்ட சில கரசேவை கிரிமனல்களும் ராம்தேவோடு மேடையைப் பாகிர்ந்திருக்கிறார்கள். தமிழகத்தைப் பொறுத்தவரை மேற்படி இந்துத்துவ அமைப்புகளோடு இந்து முன்னணி, ஆதி பராசக்தி சக்தி பீடம், அம்ம பகவான் பக்தி சபை உள்ளிட்ட அமைப்புகள் ஆதரிக்கின்றன என்பதிலிருந்தே இது பிஜேபியின் திட்டமிடப்பட்ட உண்ணாவிரதம் என்பதை ஊகிக்க முடிகிறது. ஊழலை ஒழித்து கருப்புப் பணத்தை மீட்டு தேசிய சொத்தாக அதை அறிவிக்க வேண்டும் என்பதே பொதுவான இவர்களின் கோரிக்கை.


சுவிஸ் வங்கி உண்மை நிலை என்ன?

சுவிஸ் வங்கியில் மட்டுமேதான் இந்திய பெருமுதலைகளின் கருப்புப் பணம் இருக்கிறதென்றும். அதை மத்திய அரசால் மீட்டு விட முடியும் என்றும் இவர்கள் மக்களை நம்ப வைக்கிறார்கள். சரி அது என்ன சுவிஸ் வங்கி ? நம்மூரில் உள்ள இந்தியன் வங்கி, மெர்க்கண்டைல் வங்கி மாதிரியா என்றால் இல்லை. உலகெங்கிலும் உள்ள பெரும் பண்ணைகள் தேவைக்கதிகமான பணங்களை என்ன செய்வதென்று தெரியாமல் திண்டாடிக் கொண்டிருந்த போது, சுவிட்சர்லாந்து அரசோ ஒரு குறிப்பிட்டத் தொகைக்கு மேல் கருப்புப் பணத்தை தங்கள் நாட்டு வங்கிகளில் முதலிடுபவர்கள் எங்களுக்கு வரி செலுத்த வேண்டியதில்லை என்பதோடு அவர்கள் குறித்த ரகசியங்களும் பேணப்படும் என்று அதற்கான சட்ட உத்திரவாதத்தையும் வழங்கி தங்கள் நாட்டு வங்கிகளில் பணம் முதலிட உலகெங்கிலும் உள்ள கருப்புப் பண முதலைகளை அழைத்தது. உலகெங்கிலும் உள்ள கோடீஸ்வரர்கள் தங்களின் கருப்புப் பணங்களைக் கொண்டு போய் சுவிஸ் நாட்டு வங்கிகளில் பதுக்கினார்கள். சுவிஸ் நாட்டிலுள்ள வங்கிகளில் மட்டுமல்ல உலெகெங்கிலும் உள்ள குட்டிக் குட்டி தீவுகளில் கூட இம்மாதிரி வங்கிகள் இருக்கிறது. நரசிம்மராவின் ஆட்சிக்காலத்தில் பெரும் சர்ச்சையை உருவாக்கிய செயின்ட் கிட்ஸ் வழக்குக் கூட இம்மாதிரியான ஒன்றுதான் செயின்ட் கிட்ஸ் என்பது மத்திய அமெரிக்காவில் உள்ள கரீபியன் தீவுக் கூட்டங்களில் ஒன்று. செயிண்ட் கிட்ஸ் மாதிரி செயின்ட் நேவீஸ், கிறிஸ்டோபர், லூசியா, டிரினிடாட் என பல பெயர்களால் இத் தீவுகள் அழைக்கப்படுகின்றன. பெரும்பாலான ரஷ்ய, இந்திய முதலாளிகள் கருப்புப் பணத்துக்கு பாதுகாப்பு கருதி இத்தீவுகளில் உள்ள வங்கிகளில் ரகசிய கணக்கு துவங்குவதைக் காட்டிலும் சுவிட்சர்லாந்து வங்கிகளே கருப்புப் பணத்துக்கு பாதுகாப்பு என நினைத்து அங்கு கொண்டு போய் பத்திரமாகப் பதுக்கி வைத்திருக்கிறார்கள் எனத் தெரிகிறது. அந்த வகையில் சுவிஸ் நாட்டில் உள்ள முக்கியமான வங்கியான் யூ,பி,எஸ் வங்கியில் மட்டும் சுமார் 72 லட்சம் கோடி அளவிலான தொகை இந்திய விஐபி க்களால் வைக்கப்பட்டுள்ளது என அந்த வங்கியே அமெரிக்காவுக்கு வழங்கிய ஆவணம் ஒன்றில் தெரிவிக்க அதுதான் கடந்த நாடாளுமன்றத் தேர்தலில் பிஜேபியின் ஒரு கோஷமாக மாற்றப்பட்டது.பின்னர் காங்கிரஸ் வென்று நிதியமைச்சராக பிரணாப்முகர்ஜி பொறுப்பேற்ற பின்னர் கண் துடைப்புக்காக சுவிஸ் வங்கிகளில் இந்தியர்கள் வைத்துள்ள கருப்புப் பணம் குறித்த விபரங்களை சுவிட்சர்லாந்து அரசிடம் கேட்ட போது, சுவிஸ் அரசு. ‘‘இந்திய அரசு தனது நாட்டு டெலிபோன் டைரக்டரியை எங்களிடம் தந்து, அதில் உள்ளவர்களின் பெயரில் ரகசிய கணக்கு இருக்கிறதா என்று கேட்கலாம் என்று நினைத்தால், அது நடக்காது. அதை சுவிஸ் நாட்டு சட்டமும் அனுமதிக்காது.எனவே, ரகசிய கணக்கு வைத்துள்ளவர்களின் பட்டியலை கேட்டு இந்தியா எங்களை அணுக வேண்டாம்” என்று நெத்தியடியாகக் கூறியது சுவிஸ் அரசு.




இந்துக்களுக்காக அழுகிறவர்கள் இவர்களா?

சரி ஏழு கடல் தாண்டி ஏழெட்டு மலைதாண்டி சுவிஸ் நாட்டில் இருக்கும் பணத்தை மீட்பது இருக்கட்டும் உள்ளூரில் ஆஸ்ரமங்கள், மடாலயங்கள், அறக்கட்டளைகள் என்ற பெயரில் சுவிஸ் வங்கியில் முடங்கியிருக்கும் கருப்புப் பணத்திற்கு நிகரான பணத்தை காங்கிரசோ, பிஜேபியோ மீட்டு விடலாமே? அதைச் செய்ய பிளைட் ஏறிப் போக வேண்டிய அவசியமே இல்லையே? சுவிஸ் வங்கியில் உள்ள கருப்புப் பணம் குறித்துப் பேசும் ராம்தேவுக்குச் சொந்தமான அறக்கட்டளையின் சொத்து மதிப்பு சுமார் 20,000 கோடிக்கு மேல் என்கிறார்கள். சாய்பாபாவில் தொடங்கி வேதாந்தி உள்ளிட்ட பெரும்பலான இந்துச் சாமியார்களின் ஆஸ்ரமங்கள் உள்ளூரின் சுவிஸ் வங்கிகளாகவே செயல்படுகின்றன, கருப்புப் பணத்தை முடக்குவதற்காகவே இவர்கள் அறக்கட்டளை என்ற போர்வையில் சாமியார்களாக உலாவருகிறார்கள். பெரும் நிலப்பிரபுக்களாகவும் இந்திய பெரு முதலாளிகளாகவும் இருக்கும் பிஜேபி, காங்கிரஸ் பிரமுகர்களின் பெருமளவு கள்ளப் பணங்கள் இந்த அறக்கட்டைகளில் பத்திரமாக வைக்கப்பட்டுள்ளன. இப்படி பெரும் பண முதலைகளின் கருப்புப் பண முதலைகள்தான் இன்றைய இந்தியாவின் போராட்ட நாயகர்கள். முன்னர் இவர்கள் மிலேச்ச கிறிஸ்தவர்களாலும், வந்தேறி முஸ்லீம்களாலும் இந்தியாவுக்கு ஆபத்து என்று இந்துக்களை ஒன்று திரட்டினார்கள். மசூதியை இடித்தார்கள். குஜராத்தில் இனப்படுகொலை புரிந்தார்கள். இன்று இவர்களே ஊழலுக்கு எதிராகப் போராடுகிறார்கள்.

ஆனால் இவர்களின் காதுகளுக்கு கோடிக்கணக்கான பெரும்பான்மை இந்து மக்களின் ஓலங்கள் கேட்பதில்லை. குஜராத்திலும், ஒரிசாவிலும்,மத்திய பிரதேசத்திலும் எரித்துக் கொல்லப்பட்ட முஸ்லீம்கள், கிறிஸ்தவர்கள்,தலித்துக்களின் பிணங்களை வைத்து பெரும்பான்மை நெருப்பை எரிய விட்ட கும்பலால் அதை ஒரு கட்டத்திற்கு மேல் நீடித்துச் செல்ல முடியவில்லை. தனியார், தாராளமயக் கொள்கையின் விளைவாய் விளை நிலங்களை இழந்த பெரும்பான்மை இந்து ஏழை மக்களின் ஓலமும், பன்னாட்டு நிறுவனங்களுக்காய் பருத்தி விளைவித்து பின்னர் விவசாயம் செய்த போது விளை பொருளுக்கு விலை இல்லாமல் தற்கொலை செய்து கொண்ட ஆயிராமாயிரம் ஏழை இந்துக்களின் ஓலங்கள் இந்த காவிச் சாமியர்களுக்கோ, இந்துப் பாசிசக் கும்பலுக்கோ கேட்பதில்லை. நாடெங்கிலும் துறைமுகங்கள், அணு உலைகள், சுரங்கங்கள், மேலாண்மை பொருளாதார மண்டலங்கள், கனிமக் கொள்ளை என்னும் பெயரில் மக்களிடமிருந்து அக்கிரமான முறையில் பறிக்கப்பட்ட நிலங்கள் பற்றியோ, ஆக்ரமிப்பை அகற்றுகிறோம் என்ற பெயரில் நடைபாதை இந்து வியாபாரிகள், வீடற்ற இந்து ஏழைகள் கோடிக்கணக்கில் தூக்கி வீசப்பட்டது குறித்தோ ராம்தேவ் உள்ளிட்ட இந்துத்துவக் கும்பலுக்கு அக்கறை இல்லை.சமீபத்தில் அமெரிக்காவில் பிடிபட்ட தீவீரவாதி ஹெட்லியில் வாக்குமூலத்தையும் நாம் நினைவுபடுத்துவது நல்லது. அவர் இந்தியாவில் உள்ள இந்துச் சாமியார்களுக்கும் தனக்கும் உள்ள தொடர்பை அம்பலப்படுத்துகிறார். அதில் சிவசேனாவைச் சாந்த ஒரு இரண்டாம் மட்டத் தலைவருடன் பன்னாட்டு நிறுவனங்களின் ஏஜெண்டாக அறிமுகமாகிறார் தீவிரவாதி ஹெட்லி. இந்தியாவில் மக்கள் விளைநிலங்கள் உள்ளிட்ட வளங்களை பன்னாட்டு நிறுவங்களுக்கு தன்னால் விலைபேசித் தர முடியும், முதலீடுகளைப் பெற்றுத்தர முடியும் என்று ஹெட்லிக்கு உறுதியளிக்கிறார் அந்த சிவசேனா பிரமுகர். ஹெட்லியின் நோக்கம் பால்தாக்கரேயைக் கொல்வது அல்லது இங்குள்ள இந்துத் தலைவர்களைக் கொல்வது அதற்காகத்தான் அவர் பன்னாட்டு ஏஜெண்ட் என்று சிவசேனா தலைவருடன் பழகுகிறார். ஆனால் இந்த தேசப்பற்றாளார்களான சிவசேனா கும்பலோ இந்து மக்களின் நிலங்களை அடிமாட்டு விலைக்குப் பேசியும் அடியாள் பலத்தை பயன்படுத்தி பிடுங்கி பன்னாட்டு நிறுவங்களுக்குக் கொடுக்கவும் பேரம் பேசுகிறார். இதுதான் இந்த கும்பலின் தேச பக்தி. இந்து மக்களிடம் இவர்கள் காட்டும் அன்பும் இதுதான்.

தனியார் தாராளமயக் கொள்ளைக்காக திறந்து விடப்பட்டுள்ள தாராளச் சந்தையின் ஒரு அங்கமாகவும், பன்னாட்டு நிறுவனங்களுக்கு தரகு வேலை பார்க்கும் அரசியல் தரகர்களின் கூட்டுக் கொள்ளையுமே ஊழல். ஒட்டு மொத்த நாடும் பன்னாட்டு நிறுவனங்களின் நவீன மறுகாலனியாக மாற்றப்படும் சூழலில் அதன் ஒரு அங்கமாக மட்டுமே ஊழலை நாம் காண முடியும். அந்த ஊழலில் காங்கிரசும், பிஜேபியும் கூட்டுக்களவாணிகள் என்பதை மறைத்து விட்டு சாமியார்களை வைத்து ஊழல்தான் இந்தியாவின் தனித்த பிரச்சனை, ஊழலை ஒழித்து விட்டால் நாடும் மக்களும் முன்னேறி விடுவார்கள் என்றும் ஊதிப் பெருக்குகிறார்கள். தொண்ணூறுகளில் இந்துக் கும்பல் முன் வைத்த ஒரே நாடு, ஒரே மக்கள், ஒரே மதம் என்ற கோஷத்தை இன்று இந்தியாவில் முன் வைக்க முடியாது.

ஏனென்றால் பெரும் கோடீஸ்வர மேல் வர்க்கம், பணக்கார வர்க்கம், மேல் மத்திய தரவர்க்கம், கீழ் மத்தியதரவர்க்கம், மத்தியதரவர்க்கம், என்று மக்கள் பிளவுண்டிருக்கிறார்கள். பட்டினியின் விளிம்பில் பெரும்பலான இந்து மக்கள் தள்ளப்பட்டிருக்கும் நிலையில் இன்னொரு பக்கம் கோடீஸ்வரக் கும்பலோ நாடு தங்களால் முன்னேறுகிறது என்ற மாயையை கட்டி எழுப்பிக் கொண்டிருக்கிறது. இந்த முரணை அரசியல் தளத்தில் எதிர்கொள்ள முடியாத இந்து மதக் கும்பல் இப்போது ஒரே நாடு ஒரே மக்கள் ஒரே மதம் என்ற கோஷத்தை முன் வைத்தால் ஆமாடா நானும் இந்து நீயும் இந்து அப்படியென்றால் நான் மட்டும் ஏனப்பா சோத்துக்கில்லாமல் கஷ்டப்படுகிறேன் என்று கேட்கும் நிலையில் விழுந்து விட்ட இந்து ஒற்றுமையை தூக்கி நிறுத்த இவர்கள் கண்டு பிடித்ததுதான் ஊழலுக்கு எதிரான இயக்கம். இதையே மீண்டும் நாட்டைச் சூழும் காவிமேகமாக கட்டி எழுப்பும் வல்லமை பார்ப்பனர்களுக்கும் அதன் ஊடகங்களுக்கும் உண்டு. நாம் ஏமாந்தால் நொடியில் இந்தச் சமியார்கள் ஒரு கெரோசின் பாட்டிலையும், சூலாயுதத்தையும் கையில் கொடுத்து சிறுபான்மை மக்கள்தான் இந்த ஊழலுக்குக் காரணம் அவர்களைக் கொல்லுங்கள் என்று சொல்வார்கள்.

டில்லிச் சம்பங்களை இந்திய வரலாற்றின் கருப்பு தினம் என்கிறார் அத்வானி. தன் வாழ்நாளின் மோச்மான நாள் என்கிறார் ராம்தேவ். இந்திய ஜனநாயகத்தின் மோசமான படுகொலை என்கிறார் அன்னா அசாரே.... பாபா ராம்தேவ் கூட்டத்தின் மீது நடத்தப்பட்ட மென்மையான தடியடியே ஜனநாயகப்படுகொலை என்றால் பாபர் மசூதியை இடித்தது, குஜராத்தில் ஆயிரக்கணக்கில் அழித்தொழித்தது, டில்லியில் வீதி வீதியாக சீக்கிய மக்களைக் கொலை செய்தது, ஸ்ரீக்காகுளத்தில் அணுஉலைக்கு எதிராக போராடிய மக்களைச் சுட்டுக் கொன்றது, தண்டகாரண்யாவில் பழங்குடி மக்கள் மீது போர் தொடுப்பது. காடுகளிலும் நிலங்களிலும் கடலோரங்களிருந்தும் மக்களை வெளியேற்றுவது இதெல்லாம் என்ன ராம்? இந்திய ஜனநாயகத்தின் பொன்னெழுத்துக்களால் பதிய வேண்டியவைகளா?

டி.அருள் எழிலன்.

தண்டகாரண்யாவில் சல்வார்ஜூடும்- இராமேஸ்வரத்தில் இலங்கை கூலிப்படைகள்.

இதுவரை 539 மீனவர்களை இலங்கைக் கடற்படைச் சுட்டுக் கொன்றிருக்கிறது.இந்திய அரசோ தமிழக அரசோ உருப்படியாக எந்த நடவடிக்கையும் இதுவரை எடுத்ததில்லை. மக்களுக்கு எதிரான ஜெயலலிதாவும், கருணாநியும் நடத்தும் அரசியல் நாடகங்களுக்கு மட்டுமே இந்தப் படுகொலைகள் இதுவரை பயன்பட்டு வந்திருக்கிறது. தமிழகத்தின் பழவேற்காட்டில் தொடங்கி குமரி மாவட்டம் நீரோடி வரை சுமார் ஆயிரத்துச் சொச்சம் கிலோ மீட்டரைக் கொண்ட வங்கக்கடலிலும், அரபிக் கடலிலுமாக மீன் பிடிக்கிறார்கள். இந்திய இலங்கை கடல் எல்லையில் மட்டுமே கடந்த முப்பது ஆண்டுகளாக தமிழக மீனவர்கள் மீதான இந்தத் தாக்குதலை இலங்கை மேற்கொண்டிருக்கிறது. அமெரிக்காவின் இரட்டைக் கோபுரத் தகர்ப்பின் பின்னர் எல்லா எதிர்ப்பியக்கங்களுக்கும் அமெரிக்கா உருவாக்கிய பயங்கரவாத முத்திரையை புலிகளுக்கு எதிராக மிகத் தந்திரமாகப் பயன்படுத்திய ராஜபட்சே, இந்தியாவின் தனியார் தாராளமயாக்கலையும் மக்களின் நிலங்களை தனியாருக்கு தாரை வார்க்கும் அதன் உள்நாட்டு முதலாளிகளின் நலனையும் புரிந்து கொண்ட ராஜபட்சே இந்திய, இலங்கை நலன்களுக்காக இராமேஸ்வரம் மீனவர்களைக் கொன்று அந்த கடல்பகுதியில் இருந்து அப்புறப்படுத்த நினைக்கிறார். மிகச் சரியாக தமிழக தலைவர்கள் குறித்தும் அறிந்து வைத்திருக்கும் ராஜபட்சேவுக்கும் அவரது கும்பலுக்கும் தெரியும் தமிழகத்தில் உள்ள அரசியல் தலைவர்கள் கோமாளிகள் என்று. கோமாளிகளால் முன்னெடுக்கப்படும் தேர்தல் நேர நாடகமென்பதும் ராஜபட்சேவுக்குத் தெரியும். அதனால்தான் வழக்கம் போல இந்தியாவோடு பரஸ்பர புரிதலோடு இந்த மீனவர் படுகொலைகளை வைத்தே கடற்கரை தொடர்பான கட்டுப்பாடுகளைக் கொண்டு வரும் முயற்சியில் இரு நாடுகள் இறங்கியிருக்கிறது. மீனவர்களுக்க்கு லைசென்ஸ் முறை கொண்டு வந்து கடலோரத்தில் மீன் பிடிப்பை ஒழுங்கு செய்வது, பன்னாட்டு நிறுவனங்களின் கடல் கொள்ளைக்கு எதிராக அவர்களின் ஏரியாவுக்குள் ஊடுறுவும் நம்மூர் படகுகளை கைப்பற்றி சட்டவிரோத காவலில் வைத்து, தீர்மானிக்கப்பட்ட தீர்ப்பின் படி ஒன்பது வருடம் வரை சிறையில் தள்ளுவது (கைது செய்யப்படுகிற மீனவர்களை எத்தனை நாள் வேண்டுமென்றாலும் சட்டவிரோத காவலில் வைத்திருக்க அனுமதிக்கிறது இச்சட்டம்) என்கிறது அந்த கருப்புச் சட்டமான கடற்கரை மேலாண்மைச் சட்டத்தின் ஷரத்துக்கள்.


வழக்கம் போல மீனவர் படுகொலைகளின் போதும் நாடகமாடும் ஜெயலலிதா, கருணாநிதி யார் இனி ஆட்சிக்கு வந்தாலும் இச்சட்டத்தை அமல்படுத்துவார்கள். நாம் நடத்திக் கொண்டிருக்கும் திராவிட, தமிழ் தேசிய அரசியல் எதுவாக இருந்தாலும் அது எல்லையோர பழங்குடி மக்களை நிராகரிக்கும் ஒரு அரசியலே. புவியியல் ரீதியாக புறக்கணிக்கப்பட்ட பழங்குடிச் சமூகங்கள் அதிராக வர்க்கங்களுக்கு எதிராக எழுச்சி பெறும் இந்தக் காலத்தில் இந்தியாவின் தெற்கு மூலையில் எல்லையோரப் பழங்குடிகளான மீனவ மக்களை இந்தியாவும் இலங்கையும் சேர்ந்தே வஞ்சிக்கிறது. இரு நாடுகளுக்குமே அந்தப் பகுதியில் மீனவர்கள் வாழக்கூடாது என்பதுதான் எண்ணம். நீண்டகால அரசியல் திட்டங்களும், இராணுவ நோக்கங்களும், வர்த்தக நோக்கங்களுமாக பல காரணிகளின் இந்திய இலங்கை அரசுகளுக்கு இருப்பதால் அவர்கள் இக்கொலைகளை ஊக்குவிக்கிறார்கள். முன்னர் நேரடியாக இராணுவத்தை வைத்து இக்கொலைகளை செய்த இலங்கை அரசு இப்போது சட்டவிரோத ஆயுதக் குழுக்களை இக்கொலைகளுக்கு பயன்படுத்துவதாகத் தெரிகிறது. தண்டகாரண்யாவில் சல்வார்ஜூடும் என்ற சட்டவிரோத ஆயுதக் குழுவை பழங்குடி மக்கள் மீது ஏவும் இந்திய அரசு. இராமேஸ்வரத்தில் இலங்கை அரசின் கூலிப்படைகளை தனது சொந்தக் குடிகளாக மீனவப்பழங்குடி மக்கள் மீது ஏவ அனுமதிக்கிறது. இக்கொலைகளை இந்தியாவும் இலங்கையும் சேர்ந்தே நடத்தும் இனப்படுகொலை என்று சொல்வதற்கான முழு உண்மையும் இதில் உள்ளது. இந்தியாவின் கோரமான இந்தப் பச்சைப் படுகொலைகளை கண்டிக்கவோ சுட்டிக்காட்டவோ தயங்கும் நாம் சீனா இந்தியாவைத் தாக்குகிறது, பாகிஸ்தான் இந்தியா மீது பாய்கிறது என்று கரடி விட்டுக் கொண்டிருக்கிறோம். மக்களை குண்டு வைத்துக் கொல்லும் பயங்கரவாத அழிவு சக்திகள் செய்யும் நாசகார வேலையைத்தானே இந்தியா அதன் சொந்தக் குடிகள் மீது செய்கிறது.


ஒரு இணைய முயர்ச்சி. www.savetnfisherman.org

மீனவர் படுகொலை தொடர்பாக இருந்த அலுப்பையும் சலிப்பையும் போக்கியது இந்த இணையதளம்தான். யுவகிருஷ்ணா இதை ஆதரியுங்கள் என்று தன் ப்ளாக்கில் போட்டிருந்தார் முதலில் அது என்னவன்று எனக்குப் புரியவில்லை. பின்னர்தான் தெரிந்தது டிவிட்டர் மூலம் குறிப்பிட்ட ஒரு பிரச்சனைக்காக கருத்துப் பரிமாறி உலக அளவில் கவனத்தை ஈர்க்கும் ஒரு இணையதளம் இது என்று. நன்றாக இருந்தது பல முன்னணி பதிவர்களும் டிவிட்டர்களும் வந்து கருத்துச் சொன்னார்கள். பத்ரி, சந்தனமுல்லை, கார்த்திக், அதிஷா, பாலபாரதி, உண்மைத்தமிழன், இன்னும் ஏராளமானோர் கமெண்டுகள் அடிக்கடி வந்தது. நானும் கமெண்ட் போடலாம் என்று போட்டேன் ஒரு கட்டத்தில் என்ன போடுவதென்று தெரியவில்லை. கருணாநிதியைத் திட்டி நான்கைந்து கமெண்டுகளைத் தட்டி விட்டேன். அதாவது கருணாநிதி மீது இருக்கும் அரசியல் விமர்சனம் வேறு. ஆனால் இந்த இணையம் கருணாநிதியைத் திட்ட துவங்கியதல்ல இது நமது மீனவர் பிரச்சனையை, இந்தியாவின், தமிழகத்தின் வஞ்சகத்தை, அதன் கையாலாகத் தனத்தை, அல்லது சொந்தக் குடிகளுக்கு அரசுகள் செய்யும் துரோகத்தை உலக அளவில் பேசி கவனத்தை ஈர்ப்பதே நோக்கம் என்னும் போது குறிப்பிட்ட பிரச்சனை தொடர்பான கருத்துக்களை பரிமாறுவதன் மூலமே நோக்கத்தில் வெற்றி ஈட்ட முடியும். தவிறவும் ரோசா வசந்த் ஒரு கமெண்ட் போட்டிருந்தார் ’’சத்தம் போடாதீங்க ஆங்கிலத்தில் எழுதுங்கள்” என்கிற தொனியில் சொல்லியிருந்தார் எனக்கு கொஞ்சம் கடுப்பாக இருந்தாலும் அதுதான் உண்மை. தமிழை மட்டுமே வைத்துக் கொண்டு இனி காலத்தை ஒட்ட முடியாது. தமிழில் அதிகமானோர் பங்காற்றும் அதே நேரத்தில் காத்திரமான மொழி பெயர்ப்புகள், கட்டுரைகளை ஆங்கிலத்தில் உருவாக்க வேண்டும். தமிழில் இருக்கும் கட்டுரைகள் எந்த அந்நிய மொழிச் சிந்தனைகளுக்கும் சளைத்ததல்ல அக்கட்டுரைகளை ஆங்கிலத்தில் மாற்றி இந்த இணையம் மூலம் கொண்டு செல்ல வேண்டும். வெகுவேகமாக உருமாறிக் கொண்டிருக்கும் தகவல் தொழில் நுட்பமும் உலக அளவில் செய்திகளைக் கொண்டு சேர்க்கவும் ஆங்கிலப் பகிர்தல்கள் அவசியம். ஆங்கிலம் தெரிந்த நபர்கள் உண்மையான அக்கரையோடு இதில் களமிரங்க வேண்டும். என்பது என் கோரிக்கை. மற்றபடி www.savetnfisherman.org இணையத்தை துவங்கியவர்களே இந்த வருடத்தின் மிகச் சிறந்த மனிதர்கள் கருத்துப் பரவலில் சிறந்த முன்னோடிகளாக திகழ்ந்து இந்தியா முழுக்க ஒரு டிவிட்டரில் ஒரு அதிர்வை ஏற்படுத்தியிருக்கிறார்கள். இது ஒரு இணையக் கிளர்ச்சிதானே? அந்த நண்பர்களை பாராட்டுகிறேன். மீனவர் படுகொலை தொடர்பாக உங்கள் கட்டுரைகளை savetnfisherman@gmail.com அனுப்புங்கள்.

பிநாயக்சென் நீதிமன்ற அச்சுறுத்தல்.

மௌனமாக இருப்பவர்கள் புத்திசாலிகள். ஏனென்றால் அடக்குமுறைகளுக்கு எதிராக நீங்களும் நானும் எப்போது பேசத் துவங்குகிறோமோ அப்போது உங்களை நானும் என்னை நீங்களும் தோழர் என்று அழைத்துக் கொள்கிறோம். தோழர் என்றால் அவர்களைப் பொறுத்தவரை கம்யூனிஸ்ட். அதுவும் ஆயுதம் தாங்கிய மாவோயிஸ்ட் , புண்ணிய பாரத்தின் தேசப் பாதுகாப்புக்கு அச்சுறுத்தலானவர்கள் தோழர்கள். சேவின் மரணத்தின் பின்னர் மிகவும் கவர்ச்சிகரமான வார்த்தையாகிப் போன தோழர் என்ற சொல்லை அதற்குரிய உண்மையான அர்ப்பணிப்போடு பெற்றுக் கொள்ளும் எவருக்கும் எந்த வயதிலும் விதிக்கப்படலாம் ஆயுள் சிறை. அதைத்தான் மக்கள் மருத்துவர் பிநாயக்சென் உள்ளிட்ட தோழர்களுக்கு வழங்கி செய்தி சொல்லியிருக்கிறது ராயப்பூர் நீதிமன்றம். உள்நாட்டு அச்சுறுத்தலை எதிர்கொள்ள நீதிமன்றங்களும் விசாலமான சிறைகளும் நாடெங்கிலும் உள்ள போது இன்னொரு அமைச்சகம் தனியாகத் தேவையில்லை. இந்த உள்நாட்டு அச்சுறுத்தல்களை நாங்கள் கவனித்துக் கொள்கிறோம் என்று உள்துறை அமைச்சகத்திற்கும் சிதம்பரத்திற்கும் சொல்லியிருக்கிறது ராயப்பூர் நீதிமன்றம்.

2007- ல் ஆந்திராவில் வைத்து மாவோயிஸ்ட் தலைவர் நாராயணன் சன்யால் கைது செய்யப்பட்டார். பின்னர் விடுவிக்கப்பட்டு மூன்றாவது நாள் ராயப்பூரில் கைது செய்யப்பட்டார். அடுத்து பழங்குடி மக்களை ஆதரிக்கிற பியூஸ் குஷா கைது செய்யப்பட்டார்.பியூஸ் குஹாவிடமிருந்து கைப்பற்றியதாகச் சொன்ன கடிதத்தின் அடிப்படையில் டாக்டர் பிநாயக்சென் கைது செய்யப்பட்டார். இந்த மூவருமே மாவோயிஸ்சுகளோடு தொடர்புடையவர்கள் என்று சந்தேகிக்கப்படுகிறவர்கள் மட்டுமே , குற்றம் நிரூபிக்கப்பட்டவர்கள் அல்ல என்னும் நிலையில் சட்டீஸ்கர் உயர்நீதிமன்றமும், உச்ச நீதிமன்றமும் டாக்டர் சென்னுக்கு ஜாமீன் மறுத்தது. இரண்டாவது முறை உச்சநீதிமன்றத்தில் மனுத்தாக்கல் செய்த பின்னர்தான் பிநாயக்சென்னுக்கு ஜாமீன் கிடைத்தது. இதில் 71 வயது முதியவரான நாராயணன் சன்யாலுக்கு கடைசிவரை ஜாமீன் கிடைக்கவே இல்லை. இப்போது ஆயுள் தண்டனை வேறு. நக்சல்பாரி கிளர்ச்சியின் நாயகன் சாருமஜூம்தார் அழைப்பை ஏற்று வசதியாக தான் பார்த்து வந்த அரசு வேலையான வங்கி வேலையை உதறிவிட்டு அமைப்பிற்கு வந்தவர் சன்யால். முதுமையான இந்த வயதில் தனிமைச் சிறையில் அடைக்கப்பட்டிருக்கிறார்.


பிநாயக் சென் மீதான குற்றச்சாட்டுகளோ வேடிக்கையானவை 33 முறை சிறைக்குள் நாராயணன் சன்யாலைச் சந்தித்தார். நாராயணன் சன்யால் பியூஸ் குஹாவுக்கு எழுதிய கடிதத்தில் பிநாயக்சென்னை தோழர் என்று அழைக்கிறார். மாவோயிஸ்டுகளோடு தொடர்பில் இருந்தார், தேசப்பாதுகாப்புக்கு அச்சுறுத்தலாக இருந்தார் இதெல்லாம்தான் சென் மீதான குற்றச்சாட்டு. ஒரு மருத்துவர் வயது முதிர்ந்த ஒரு மனிதரை சிகிச்சை தொடர்பாக சிறைக்குள் சந்திப்பதையும், இந்திய பி.யூ,சி. எல் அமைப்பின் ஒரு தலைவர் என்ற முறையில் சன்யாலைச் சந்திப்பதையும் கூட இந்திய நீதிமன்றம் தண்டனைக் குரிய குற்றமாகப் பார்த்திருக்கிறது. சிறைக்குள் பரிமாறிக் கொண்ட கடிதம் தொடர்பான குற்றச்சாட்டை சிறையதிகாரிகளே நீதிமன்றத்தில் மறுத்திருக்கிறார்கள். ஆனால் நீதிமன்றம் அவர்களின் வாக்குமூலத்தை ஏற்க மறுத்து ஏற்கனவே எழுதப்பட்ட தீர்ப்பை வாசித்திருக்கிறது. இந்த வழக்கில் மாறிப்போன பிறழ் சாட்சிகளைக் கூட கணக்கில் எடுக்காமல் உலகம் முழுக்க அறியப்பட்ட ஒரு மனித உரிமை செயற்பாட்டாளரை ராயப்பூர் கீழ் நீதிமன்றமே ஏன் தண்டிக்க வேண்டும்?


மக்களிடம் நிலம் இருப்பதை அரசுகள் விரும்பவில்லை. கனிம வளங்கள் நிரம்பிய நிலம் மட்டுமல்ல விவசாய நிலங்கள் மக்களிடமிருப்பதைக் கூட அரசுகள் விரும்பவில்லை. அவைகள் பன்னாட்டு நிறுவனங்களின் ஏகபோகக் கொள்ளைக்குத் தேவைப்படுகின்றன. தேவைப்படும் நிலத்தை சொந்தக் குடிகளிமிருந்து அபகரித்துக் கொடுக்கும் ஒரு தரகு வேலையை அரசு இயந்திரங்கள் செய்கின்றன. நிலம் பறிபோகிற பொது மக்களின் எதிர்ப்பென்பது இயல்பான ஒன்றுதான். அப்படியான எதிர்ப்பை வெளிப்படுத்துகிறவர்கள் மாவோயிஸ்டுகளாக இருந்தாலும் மக்களாக இருந்தாலும் அவர்களை அழிக்க அரசு இயந்திரம் களமிரக்கப்படும் சல்வார்ஜூடும் மாதிரியான சட்ட விரோதப்படைகளும் களமிரக்கப்படும். நீங்கள் அரசி இயந்திரத்தை மட்டுமல்ல சட்டவிரோத ஆயுதக் குழுக்களையும் எதிர்க்க முடியாது. அப்படி எதிர்ப்பவர்கள் யார் என்றாலும் அவர்களுக்கு வயது வித்தியாசம் இல்லாமல் தண்டிக்கப்படுவார்கள். அதற்கு சாட்சியங்கள் அவசியமில்லை.

டாக்டர் சென் துவக்கத்தில் சட்டீஸ்கர் மாநில சுகாதாரத்துறை அமைச்சகத்துடன் இணைந்தும் சுரங்கத் தொழிலாளர்களுக்காக பணி செய்திருக்கிறார். எப்போது அவர் அரசு இயந்திரத்திற்கு எதிராகப் பேசத் துவங்கினாரோ அப்போதே குறி வைக்கப்பட்டு விட்டார். காந்தீயக் கொள்கையின் படி பழங்குடி மக்கள் மத்தியில் வாழ்ந்த ஹிமான்சு குமாருக்கு என்ன நடந்தது? அவர் சட்ட விரோத சல்வார் ஜூடும் படைகளின் படுகொலைகளுக்கு எதிராகப் பேசினார். அவரது ஆஸ்ரமம் நொறுக்கப்பட்டு டில்லிக்குத் துரத்தப்பட்டார். இப்போது அவர் சட்டீஸ்கரில் இல்லை. பிநாயக்சென்னும் சல்வாய்ஜூடும் படைகளின் கொலைகளுக்கு எதிராகப் பேசினார் அப்போதே அவருக்கு எதிரான தீர்ப்பை எழுதி முடித்து விட்டார்கள்.இடையில் நடந்ததெல்லாம் வெறும் கண் துடைப்பு நாடகங்கள். இப்போது சல்வார்ஜூடும் போலவே பத்திரிகையாளர்களையும் மனித உரிமை ஆர்வலர்களையும் அச்சுறுத்த இன்னொரு படையை உருவாக்கியிருக்கிறார்களாம் சட்டீஸ்கரில்.

எழுபதுகளில் தொடங்கி இன்றுவரை அஸ்ஸாமில், ஆந்திராவில், கேரளாவில், சட்டீஸ்கரில், பஞ்சாபில், காஷ்மீரில் என்று பல் வேறு மனித உரிமை செயற்பாட்டாளர்கள் இராணுவப் படைகளால் கொல்லப்பட்டிருக்கிறார்கள். ஆனால் கொல்லப்பட்ட இந்த மனித உரிமையாளர்கள் எவரும் அருந்ததிராய், பிநாயக்சென் போன்று உலகெங்கும் அறியப்பட்டவர்கள் அல்ல அதனால் எளிதாகக் கொன்று விட முடிகிறது. ஆனால் அதை விட மோசமான அடக்குமுறையாக இந்த ஆயுள் தண்டனை அச்சுறுத்தல் உள்ளது. இந்திய வரலாற்றில் முதன் முறையாக ஒரு மனித உரிமையாளருக்கு ஆயுள் தண்டனை விதிக்கப்பட்டிருக்கிறது. இது அருந்ததிராய்க்கு மட்டுமல்ல அறிவுலகில் அரசின் அடக்குமுறைகளுக்கு எதிராக பேசவோ எழுதவோ துணியும் எல்லோருக்கும் எதிரான அச்சுறுத்தல். எழுதி முடிக்கப்பட்டு சிறைக்கு அனுப்பட்டு விட்ட நம் மக்கள் மருத்துவர் பிநாயக்சென்னை விடுவிப்பது என்பது நாம் உலகெங்கிலும் முன்னெடுக்கும் போராட்டங்களில் மட்டுமே தங்கியிருக்கிறது.

இந்திய அரசே!

டாக்டர் பிநாயக்சென்னை விடுதலை செய்!

எழுபது வயது முதியவர் நாராயணன் சன்யாலை விடுதலை செய்!

பழங்குடி மக்கள் மீதான வழக்குகளை திருமப்பெறு!